1/ Kimua
Ongi etorri Bitargi proiektuaren blogera. Lehenengo sarrera honetan, proiektua bera aurkeztuko dizuet. 2021 urtearen amaieran, era autonomoan lan egiteko erabakia hartu eta ibilbide berri batean murgildu nintzen. Azken urteetan, teknologiaren erabileraren eta adimen emozionalaren inguruko formakuntza eta tailerrak burutzen aritu izan naiz, ikasle, irakasle, guraso eta hezkuntza arloan lan egiten duten bestelako langileekin.
Berez, nire interes nagusia betidanik adimen emozionalaren gaian kokatua egon da. Teknologiaren arloa, berriz, nire bizitzan kasualitatez gurutzatu zen.
Arlo berri bat ezagutu nuen, zeinetan lan handia dagoen egiteko eta zeinak harreman zuzena duen gure garapen eta bizipen emozionalekin.
Horregatik, ekintza eta prozesu desberdinen bitartez, eta Bitargi oinarri moduan izanda, jendarte kontzienteago eta osasuntsuago baten bilakaeran aritzea izango da nire asmoa.
Azken hamarkadetan, teknologiaren eraginak aldaketa asko ekarri ditu pertsonon portaera eta ohituretan, eta gure bizitzako arlo guztietan, (osasuna, harremanak, kontsumoa, entretenimendua,….). Eragin eta aldaketa horiek aztertu, ulertu eta aurreikustea nire interes nagusienetako batean bilakatu zen. Bestalde, enpresa teknologikoen funtzionamendu, politika eta negozio ereduak ezagutzea ezinbesteko iruditzen zait, emozioen erabilerak, hauetan betetzen duen papera dela eta. Horregatik, arlo hori, bai blogean eta baita nire lanean ere nabarmenki azalduko da.
Nire ibilbide akademikoa, hasiera batean osasun arlora bideratuta egon zen arren, beti egon naiz harremanetan hezkuntza arloarekin, eremu ez formaletik hasita, ikastetxe eta bestelako esparruetara heldu arte. Azken urteetan, hezkuntzan lanean aritu naizenez, eta teknologiaren erabilerak hezkuntza sisteman izan duen inpaktua gertutik ikusteko aukera izan dudanez, hausnarketa eta birplanteamenduak egiteko beharra dagoela esango nuke. Horregatik, nire esku-hartze gehiena hezkuntza arloan garatuko da, baina osasun arloa ere presente izango dut beti.
Hasieran eta webguneko nire aurkezpenean azaltzen den bezala, proiektu hau nire kabuz eramango dut aurrera, baina ez naiz bakarrik egongo, bidean zehar profesional desberdinekin elkarlanean arituko naizelako. Laster, lehenengo kolaborazioen berri emateko aukera izango dut.
Azkenik, blogean zehar, iritzi artikuluak, liburu eta bideo-jokoen analisiak eta Bitargi-rekin zerikusia duten gaien inguruko berriak aurkitu ahal izango dituzue. Edozein ekarpen egin nahi izatekotan, jakin dezazuen mezu elektroniko edo telefono bitartez ongi etorriak izango direla.
